Gündə on min addım, iki litr su: Mütəxəssisdən mühüm tövsiyə

Həm 10.000 addım, həm də 2 litr su müvəqqəti tövsiyələrdir. Elmi cəhətdən sübut olunmadığı üçün onlar ciddi tələblər deyil.

Publika.az xəbər verir ki, bunu terapevt Nadejda Çernışova deyib.

Mütəxəssis qeyd edib ki, rəqəmlər sadəcə göstərişdir: "Amma bu iki litrə həm də şirələr, şorbalar, çay, qəhvə və qida məhsullarında olan bütün mayelər daxildir. Adətən bu, gündə 500-800 mililitr su təşkil edir. Ona görə də, bir qayda olaraq, gündə bir litr yarımdan çox su içmək olmaz".

Həkimin fikrincə, ən əsası özünüzü su içməyə məcbur etməməkdir. Həddindən artıq su istehlakı bədənə də zərər verə bilər, çünki natrium artıq su ilə yuyulur: "Orqanizmdə natrium səviyyəsinin aşağı olması həyat üçün təhlükəli bir vəziyyətdir. Əgər insan tez bir zamanda bir neçə litr su içərsə, sadəcə olaraq, bundan ölə bilər. Belə hallar məlumdur. Ona görə də həddindən artıq dozaya getməməlisən, amma su qəbulunu kəskin şəkildə azaltmaq da pisdir".

"Yenə də deyirəm, insanlar fərqlidir. Bizim fərqli çəkimiz, fərqli əzələ kütləsi, fərqli həyat şəraitimiz və müxtəlif fiziki fəaliyyət səviyyəmiz var. Təbii ki, fiziki işlə məşğul olan və ya idman zalında məşq edən hər kəs tərlə çoxlu maye itirir. Onlar, əlbəttə ki, daha çox su içməlidirlər, lakin bunların hamısı çox fərdidir", - Nadejda Çernışova izah edib.

O deyib ki, təbiətin bizə verdiyi ən mühüm bələdçi susuzluq hissidir. Susuzluğun ən kiçik işarəsində su içmək lazımdır. Həddindən artıq susamağa icazə vermək də zərərlidir, lakin çox su içmək də tövsiyə edilmir.

10.000 addıma gəldikdə, həkim tamamilə hər kəs üçün vahid standart ola bilməyəcəyinə əmindir, çünki fərdi xüsusiyyətləri, yaşayış şəraitini və fiziki vəziyyəti nəzərə almaq vacibdir.

"Daha çox addım atmağa çalışmaq həmişə faydalıdır, bəli. Amma kifayət qədər addım atmayanda və 10 000-ə çatmayanda özünü günahkar hiss etmək lazım deyil. 5 000 addım az-çox faydalıdır. Elə insanlar var ki, kuryer işləyir və gündə ən azı 22 000 addım gedirlər, bəzən hətta 26 000 addım atırlar. Amma elə insanlar var ki, bütün günü televizorun qarşısında oturaraq mənzillərini tərk etmirlər. Gündə 1000 addım belə onlar üçün faydalı olacaq, 5000 artıq yaxşıdır, 8000 əla, 10000 isə sadəcə gözəldir!", - həkim tövsiyə edir.

Nadejda Çernışova əminliklə bildirib ki, "10.000 addım getməyin heç bir zərəri yoxdur. Ancaq məqsədinizə çatmasanız, özünüzü günahkar hiss etməyin. Mümkün qədər çox gəzin, amma həddindən artıq etməyin. Bu, sağlamlığınız üçün ən yaxşı seçimdir".

Adəm