Geniş yayılmış bu xəstəliyin çarəsi tapıldı: Erkək dananın ürəyi

Penza Dövlət Universitetinin (PSU) alimləri erkək dananın ürək toxumasından istifadə edərək mədə və onikibarmaq bağırsağın xoralarının müalicəsi üçün bir üsul hazırlayıblar.

Publika.az xəbər verir ki, bu barədə Rusiya Təhsil və Elm Nazirliyi məlumat yayıb.

Mədə və ya onikibarmaq bağırsağın xorasının perforasiyası orqan divarının məhv olduğu mədə xorası xəstəliyinin və ya simptomatik xoraların bir ağırlaşmasıdır. Bu zaman perforasiya (deşilmə) əmələ gəlir və orqanın tərkibi qarın boşluğuna sızaraq həyati təhlükə yaradan peritonitə səbəb olur.

Bu gün belə xəstələr müxtəlif üsullarla əməliyyat olunurlar. Ən çox yayılmış üsul perforasiyanı möhkəmləndirici tikişlərlə tikməkdir. Əməliyyat zamanı bu tikişləri möhkəmləndirmək üçün çoxsaylı üsullar mövcuddur. Bunlardan biri mövcud tikişlərin üzərinə polipropilen tor implantasiya etməkdir. Lakin bədən onu rədd edə bilər. Bundan əlavə, tor implantasiyasından sonra tikiş yerlərində stenoz (daralma), eləcə də qarın boşluğunda bitişmələrin inkişafı mümkündür.

Alimlər tikiş sahəsini möhkəmləndirmək üçün yeni bir üsul təklif ediblər. Bu üsul effektivliyinə görə bütün məlum metodlardan üstündür və əməliyyatdan sonrakı ağırlaşmalar riskini azaldır. Həkimlər tikişli perforasiyaya gənc öküzlərin (erkək buzov) ürəklərindən xüsusi olaraq işlənmiş membran olan ksenoperikardial lövhənin tətbiq olunmasını təklif edirlər.

Bu material bioloji cəhətdən inertdir və antigen deyil. Buna görə də, bu lövhələrin bədən tərəfindən rədd edilməsi faktiki olaraq mümkün deyil.

Penza Dövlət Universitetinin tibb alimləri dünyada bu tip cərrahiyyədə ksenoperikardial lövhələrdən ilk dəfə istifadə ediblər. Metod tədqiq edilib, patentləşdirilib və Penza Regional Klinik Xəstəxanasının cərrahları tərəfindən istifadə olunur.

Adəm