Sizi gənə dişləyibsə, gecikməyin, yoxsa... - Həkim görün nə dedi

Havaların isinməsi ilə piknik mövsümü açıq elan olunub. Lakin təbiət qoynunda istirahət edərkən insan orqanizmi üçün ciddi təhlükə yaradan gənələri unutmamaq lazımdır. Bu kiçik canlılar dişləmə zamanı sinir sistemi, oynaqlar, ürək və digər orqanları zədələyən ciddi xəstəliklərə yol açır. Terapevt Alina Azizova gənə dişləməsi zamanı atılmalı olan təxirəsalınmaz addımları açıqlayıb.

Publika.az xəbər verir ki, bu barədə "RİA Novosti" məlumat yayıb.

Mütəxəssisin sözlərinə görə, gənə bədəndən nə qədər tez uzaqlaşdırılsa, yoluxma riski bir o qədər azalar. Gənəni çıxarmaq üçün ən doğru yol dərhal travmatoloji məntəqəyə müraciət etməkdir.

Əgər yaxınlıqda tibb müəssisəsi yoxdursa, gənəni xüsusi cihaz və ya pinsetlə ehtiyatla çıxarmaq olar. Ən vacib məqam isə gənəni atmamaqdır! Onu nəm pambıq qoyulmuş qapalı qaba yerləşdirib laboratoriyaya təhvil vermək lazımdır ki, infeksiya daşıyıcısı olub-olmadığı yoxlanılsın.

İnfeksionist Tomas Russo isə bildirir ki, gənə çıxarıldıqdan sonra proses bitmir. İnsan ən azı 30 gün ərzində səhhətini və bədənindəki dəyişiklikləri diqqətlə izləməlidir. Hər hansı qızartı, yüksək hərarət və ya ağrı müşahidə olunarsa, dərhal həkimə müraciət edilməlidir.

Müəllif: Adəm