Gündə nə qədər makaron yemək olar? - Endokrinoloqdan xəbərdarlıq

Çoxları makaronun çəki artırdığını düşünsə də, mütəxəssislər bunun dozasını açıqlayıb.

Publika.az xəbər verir ki, endokrinoloq və dietoloq Anton Polyakov "aif.ru" nəşrinə müsahibəsində sağlamlığa zərər vermədən gündəlik nə qədər makaron istehlak edilə biləcəyini deyib.

Həkimin sözlərinə görə, nişasta ilə zəngin olan bişmiş qidaların (o cümlədən makaronun) gündəlik ağlabatan norması təxminən 300 qramdır. Bu miqdar orqanizmin karbohidrat ehtiyacını qarşılayır, lakin artıq çəkiyə və şəkərin qəfil yüksəlməsinə səbəb olmur.

Ekspert vurğulayır ki, makaronun növü sağlamlığa təsir edən əsas amildir. O, bərk buğdadan hazırlanmış məhsullara üstünlük verməyi tövsiyə edir. Çünki bu növ makaronlar qanda şəkərin səviyyəsini daha yavaş artırır. Əksinə, yumşaq buğdadan hazırlanan və həddindən artıq bişirilərək yumşaldılan makaronlar glikemik indeksi artıraraq maddələr mübadiləsinə mənfi təsir göstərə bilər.

Pəhrizini daha rəngarəng və balanslı etmək istəyənlər üçün həkim paxlalı bitkilərdən (mərci, noxud və s.) hazırlanan və ya qarğıdalı unundan olan makaronları da tövsiyə edir.

Müəllif: Adəm