Tibbdə inqilab: Arıqlamaq asanlaşdı

Rusiyada tibb aləmində böyük səs-küyə səbəb olacaq yeni sistemin klinik sınaqlarına başlanılıb. Bağırsaq mikrobiotasını analiz edən bu sistemin yerli analoqu yoxdur.

Publika.az xəbər verir ki, bu barədə "İzvestiya" qəzeti Seçenov Universitetinin mütəxəssislərinə istinadən məlumat yayıb.

Yeni hazırlanan sistem PZR (PCR) metoduna əsaslanır və xəstələrə müraciət etdikləri gün nəticə almağa imkan verir. Bu texnologiya sayəsində həkimlər hər bir şəxsin fərdi mikroflorasına uyğun dəqiq müalicə metodu seçə biləcəklər.

Akademik Vladimir İvaşkinin sözlərinə görə, sistem bağırsaqdakı şərti-patogen mikroflora və "Candida" göbələkləri də daxil olmaqla, mikrobların miqdarını dəqiq qiymətləndirir. Texnologiyanın ən böyük üstünlüklərindən biri də onun maya dəyərinin aşağı olmasıdır.

Mütəxəssislər bildirir ki, bu analiz metodu təkcə mədə-bağırsaq xəstəliklərində deyil, həm də immunitet problemləri, həyəcan pozğunluğu (depressiya), piylənmə və digər metabolik pozuntuların müalicəsində effektiv olacaq. Beləliklə, artıq proprobiyotik terapiyası hər kəs üçün fərdiləşdiriləcək və daha sürətli nəticə verəcək.

Müəllif: Adəm