Yuxunun keyfiyyətini belə yaxşılaşdırmaq olar

Çinli tədqiqatçılar probiotiklərin yuxu keyfiyyətinə və səhər saatlarında insanın özünü hiss etməsinə müsbət təsir göstərdiyini müəyyən ediblər.

Publika.az xəbər verir ki, bu barədə “Frontiers in Psychiatry” jurnalında dərc olunan meta-analizdə bildirilir.

Probiotiklər bəzi fermentləşdirilmiş qidalarda və qida əlavələrində olan faydalı canlı bakteriyalardır. Alimlərin fikrincə, bu bakteriyalar bağırsaq mikroflorasının balansını qorumaqla yanaşı, “bağırsaq-beyin” oxu vasitəsilə beyin və sinir sisteminin işinə də təsir göstərə bilər.

Tədqiqat müəllifləri 4 mindən çox insanın iştirakı ilə aparılmış 39 randomizə edilmiş araşdırmanın nəticələrini təhlil ediblər. İş çərçivəsində müxtəlif növ probiotiklərin yuxu keyfiyyəti, müddəti, gündüz yuxululuğu və yuxusuzluq əlamətlərinə təsiri öyrənilib.

Nəticələr göstərib ki, probiotiklərin qəbulu yuxu keyfiyyətinin cüzi də olsa yaxşılaşması ilə bağlıdır. Belə ki, tədqiqat iştirakçıları gündüz yorğunluğundan daha az şikayət ediblər, yuxunun orta müddəti isə təxminən 14 dəqiqə artıb. Bununla belə, alimlər qeyd edirlər ki, müşahidə olunan effekt mülayim xarakter daşıyır və dəqiq qənaətə gəlmək üçün daha genişmiqyaslı araşdırmalara ehtiyac var.

Hüseyn İbadlı