Ən sağlam giləmeyvələr hansılardır?

Yay mövsümündə giləmeyvələr həm dadlı bir təam, həm də vitamin və mineral mənbəyidir.

Publika.az Gazeta.ru-ya istinadla xəbər verir ki, uşaq endokrinoloqu və nutritsioloq Darya Xaykina yayda rasiona mütləq daxil edilməli olan giləmeyvələrin siyahısını təqdim edib.

Faydalı giləmeyvələrdən biri qaragilədir. O, tərkibindəki antosianlar sayəsində damar, beyin və görmə sağlamlığı üçün çox önəmlidir. Mütəxəssis qeyd edir ki, qaragilə internetdə vəd edildiyi kimi görməni bir həftəyə bərpa etməsə də, onu müntəzəm yemək vacibdir.

Digər populyar giləmeyvə isə çiyələkdir. Həkimin sözlərinə görə, çiyələyin əsas üstünlüyü yüksək C vitamini ehtiva etməsidir. Təxminən 100 qram çiyələk gündəlik C vitamini ehtiyacının böyük bir hissəsini ödəyə bilər. Bundan əlavə, çiyələk az kalorili olduğu üçün yayda şirniyyatlara yaxşı alternativdir.

C vitamini ilə zəngin olan digər bir giləmeyvə qarağatdır. O, həm də hüceyrələri zədələnmədən qoruyan antioksidantlarla zəngindir. Nutritsioloq qeyd edir ki, qarağat dondurulmağa davamlı olduğu üçün qış aylarına tədarük görmək məsləhətdir.

Mütəxəssis moruğu da bağırsaq fəaliyyətini yaxşılaşdıran və toxluq hissi verən liflə zəngin faydalı giləmeyvə adlandırıb. Moruğun nisbətən şirin olması yayda desertlərdən imtina etməyi asanlaşdırır.

Darya Xaykina albalının da faydalarına diqqət çəkib. Albalı fiziki yüklənmədən sonra orqanizmin bərpasına kömək edir və damar sağlamlığını qoruyur. Onu təzə halda yemək, sıyıqlara və kəsmikə əlavə etmək çox faydalıdır.

Hüseyn İbadlı