Baş ağrısından xilas olmaq üçün İDEAL PƏHRİZ

"Oxford Online Pharmacy" onlayn aptekinin mütəxəssisləri içki sonrası yaranan narahatlığı (axşamdanqalma sindromu) yüngülləşdirməyə kömək edən ideal rasionu açıqlayıblar.

Publika.az xəbər verir ki, bu barədə "Surrey Live" nəşri yazır.

Ekspertlər oyandıqdan dərhal sonra böyük bir stəkan limonlu su, ardınca isə zəncəfilli və ballı çay içməyi məsləhət görüblər. Bu, maye itkisini bərpa etməyə, ürəkbulanmanı azaltmağa və həzm sistemini dəstəkləməyə kömək edəcək. Bundan əlavə, onların fikrincə, səhər saatlarında portağal yemək faydalıdır, çünki o, C vitamini və təbii şəkərlə zəngindir.

Ekspertlər içki sonrası narahatlığı yüngülləşdirmək üçün ideal rasionun vacib bir hissəsi olaraq doyumlu səhər yeməyini qeyd ediblər. Onlar banan, ispanaq və qaragilə ilə smuzi, həmçinin avokado və yumurta ilə tam taxıllı tost hazırlamağı məsləhət görüblər. Nahar üçün ekspertlər toyuq və ya mərcimək şorbası, şam yeməyi üçün isə balıq və tərəvəz yeməyi tövsiyə ediblər. Yatmazdan əvvəl isə orqanizmdə maye həcmini bərpa etmək üçün bir fincan bitki çayı və bir stəkan su içməyin ən yaxşı qərar olacağını bildiriblər.

Hüseyn İbadlı