Ən təhlükəli yalan budur - Psixiatr alkoqol asılılığının gizli əlamətini AÇIQLADI

Alkoqol asılılığı olan insanların əksəriyyətinin ətrafındakıları aldatdığı düşünülsə də, əslində onlar daha çox özlərini aldadırlar.

Publika.az xəbər verir ki, bu barədə psixiatr-narkoloq Mariya Kasperoviç "Gazeta.ru"ya açıqlamasında bildirib.

Həkimin sözlərinə görə, alkoqoldan asılı olan insanlar vəziyyətə nəzarət etdiklərinə səmimi şəkildə inanırlar və bu, şüurlu yalan deyil, psixoloji müdafiə mexanizmidir.

O qeyd edib ki, insan "Məndə problem var" fikrini qəbul etsə, həyatında dəyişiklik etməli olacaq. Buna görə də beyin vəziyyəti müxtəlif bəhanələrlə izah etməyə çalışır. "Hamı içir", "Mən heç vaxt sərxoş olmuram", "Axı işləyirəm" kimi fikirlər daxili narahatlığı azaltmağa xidmət edir.

Psixiatrın sözlərinə görə, özünü aldatma müxtəlif kiçik bəhanələrdən ibarətdir. Məsələn, insan pivəni alkoqol hesab etmir, yaxud içdiyi miqdarı istər-istəməz az xatırlayır.

Kasperoviç bildirib ki, alkoqol asılılığı olan insanlar tez-tez özlərini başqaları ilə müqayisə edirlər. Onlar "Qonşu məndən daha çox içir" və ya "Məndən pis vəziyyətdə olanlar var" deyərək problemin ciddiliyini kiçiltməyə çalışırlar.

Həkim vurğulayıb ki, oxşar psixoloji mexanizmlər digər asılılıq və psixi pozuntularda da müşahidə olunur. Çünki problemi qəbul etmək qorxu, utanc və həyat tərzini dəyişmək zərurəti yaradır.

Mütəxəssisin fikrincə, təhlükəli əlamətlərdən biri içkinin miqdarı deyil, insanın bu mövzuda özünə dürüst cavab verə bilməməsidir. Alkoqol barədə sual veriləndə əsəbiləşmək, hər dəfə içmək üçün yeni bəhanə tapmaq və qoyduğu qaydaları tez-tez dəyişmək asılılığın xəbərdaredici əlamətləri ola bilər.

Psixiatr əlavə edib ki, yaxınların insanı yalan danışmaqda ittiham etməsi əks nəticə verir. Müalicənin əsas məqsədi onu ifşa etmək deyil, vəziyyətə obyektiv baxmaq bacarığını tədricən bərpa etməkdir. Bu isə sağalma prosesinin ən vacib mərhələlərindən biri hesab olunur.

Müəllif: Adəm