Qurudulmuş manqoda "Coca-Cola"dan altı dəfə çox şəkər var - Dietoloq

Qurudulmuş manqonun tərkibindəki şəkər miqdarı bəzi şirniyyatlardan və qazlı içkilərdən daha yüksəkdir.

Publika.az xəbər verir ki, bu barədə Finlandiyanın “Yle” nəşrinə danışan dietoloq Vili Yaakkola bildirib.

Onun sözlərinə görə, 100 qram qurudulmuş manqoda 70-75 qram şəkər var. Bu göstərici “Coca-Cola”dakı şəkər miqdarından altı dəfədən çoxdur. Mütəxəssis bunu qurudulma zamanı meyvədəki suyun buxarlanması və şəkərin konsentrasiyasının artması ilə izah edib.

Dietoloq qeyd edib ki, orqanizm üçün təbii və əlavə edilmiş şəkər arasında ciddi fərq yoxdur. Buna görə də qurudulmuş meyvələr dişlərə adi şirniyyatlar kimi təsir göstərir və kiçik həcmdə olduqları üçün normadan artıq istehlak edilə bilər.

Yaakkola hesab edir ki, qurudulmuş meyvələr konfetdən daha yaxşı seçimdir. Onun sözlərinə görə, bu məhsulların tərkibində A vitamini birləşmələri və qida lifi olsa da, təzə meyvələr daha faydalıdır. Mütəxəssis alıcılara əlavə şəkərsiz qurudulmuş meyvələrə üstünlük verməyi tövsiyə edib.

Müəllif: Roza