İstidə ən təhlükəli içki məhz budur - Həkimdən xəbərdarlıq

Yay aylarında bir çox insan sərinləmək üçün soyuq pivə, sidr və ya şirin kokteyllərə üstünlük verir. Lakin mütəxəssislər xəbərdarlıq edirlər ki, məhz bu zəif alkoqollu içkilər orqanizmdə ciddi susuzlaşma və ciddi fəsadlara səbəb ola bilər.

Publika.az xəbər verir ki, bu barədə psixiatr-narkoloq Anton Rudkovski danışıb.

Onun sözlərinə görə, soyuq alkoqollu içkilər insanda sərinlik hissi yaratsa da, susuzluğu aradan qaldırmır, əksinə, orqanizmdən maye itkisini daha da artırır.

Həkim bildirib ki, isti havada orqanizm onsuz da yüksək temperatur səbəbindən gərgin rejimdə işləyir. Damarlar genişlənir, tərləmə artır və maye itkisi baş verir. Alkoqol isə bu prosesi sürətləndirərək qanın qatılaşmasına və ürəyin daha çox yüklənməsinə səbəb olur.

Rudkovski xüsusilə şirin kokteyllərin təhlükəli olduğunu vurğulayıb. Onun sözlərinə görə, şəkər və müxtəlif dadlandırıcılar səbəbindən bu içkilər asan içilir və insan nə qədər spirt qəbul etdiyini hiss etmir.

Mütəxəssis qeyd edib ki, günəş altında alkoqol qəbul edildikdə vəziyyət daha da ağırlaşır. Çünki spirtli içki insanın vəziyyəti düzgün qiymətləndirmə qabiliyyətini zəiflədir və günvurma əlamətləri gec hiss olunur. Nəticədə həm orqanizmin həddindən artıq qızması, həm də alkoqol intoksikasiyası eyni vaxtda inkişaf edərək bir-birini daha da ağırlaşdırır.

Həkim xüsusilə hipertoniya, ürək-damar xəstəlikləri, şəkərli diabetdən əziyyət çəkənlər və yaşlı insanların ehtiyatlı olmasını tövsiyə edib. Onun sözlərinə görə, hətta sağlam gənclər də uzun müddət günəş altında qalıb alkoqol qəbul etdikdə ciddi risklərlə üzləşə bilərlər.

Rudkovski isti havada alkoqolu susuzluğu yatırmaq vasitəsi kimi istifadə etməməyi, qəbul edilən spirtli içkiləri su ilə növbələməyi, qızmar günəş altında spirtli içki qəbulundan çəkinməyi və içkidən sonra uzun müddət istidə qalmamağı məsləhət görüb.

Həkim sonda vurğulayıb ki, yayda ən təhlükəli alkoqol soyuq pivə və şirin kokteyllərdir. O qeyd edib ki, bu içkilər düşünüldüyündən daha təhlükəli ola bilər.

Müəllif: Adəm