Qaraciyəri piylənmədən qoruyan təbii vasitə tapıldı

Alimlər müəyyən ediblər ki, çaytikanı (oblepixa) meyvəsinin pulpasından əldə edilən yağ metabolik mənşəli qaraciyər piylənməsi (MAFLD) xəstəliyinin əlamətlərini azaltmağa kömək edə bilər.

Publika.az xəbər verir ki, araşdırmanın nəticələri "Food & Function" jurnalında dərc olunub.

Tədqiqat zamanı məlum olub ki, çaytikanı yağı palmitolein turşusu ilə zəngin lipidlər ehtiva edir. Qaraciyər piylənməsi olan siçanlar üzərində aparılan təcrübələrdə bu yağ qaraciyərdə piy yığılmasını azaldıb, iltihabı zəiflədib, qanda qlükoza səviyyəsinin tənzimlənməsini yaxşılaşdırıb və qaraciyər toxumasının fibrozlaşmasının qarşısını alıb.

Mübadilə prosesləri, gen aktivliyi və lipid tərkibinin kompleks analizi göstərib ki, çaytikanı yağı lipid mübadiləsini normallaşdırır, xroniki iltihabla əlaqəli TLR4/AP-1 siqnal yolunu zəiflədir, immun hüceyrələrinin qaraciyərə daxil olmasını azaldır və makrofaqlar arasında tarazlığı bərpa edir. Həmçinin iltihabın təbii şəkildə sona çatmasını təmin edən xüsusi molekulların sintezini artırır.

Tədqiqat müəlliflərinin fikrincə, çaytikanı pulpasından əldə olunan yağ gələcəkdə qaraciyər piylənməsinin profilaktikası və müalicəsi üçün yeni preparatların hazırlanmasında perspektivli təbii xammal ola bilər.

Adəm