Yuxu zamanı tez-tez oyanırsınız? - Bu xəstəliyin ilkin əlaməti ola bilər

Yuxu zamanı tez-tez baş verən mikroyanılmalar Altzheymer xəstəliyinin ilkin əlamətlərindən biri ola bilər. Alimlər hesab edirlər ki, bu dəyişikliklər yaddaşla bağlı problemlər ortaya çıxmazdan illər əvvəl müşahidə edilir.

Publika.az xəbər verir ki, bu barədə “Sleep” jurnalında dərc olunan araşdırmada qeyd edilib.

Tədqiqatçılar 500-dən çox sağlam könüllünün yuxusunu təhlil edib və genetik məlumatlar əsasında onların Altzheymer xəstəliyinə poligen risk göstəricilərini hesablayıblar.

Məlum olub ki, 50-69 yaş aralığında genetik risk göstəricisi yüksək olan insanlarda gecə mikroyanılmalarının sayı da daha çox olub. Bunlar insanın tam oyanmasına səbəb olmayan, lakin yuxunun strukturunu pozan qısa müddətli beyin aktivləşmələridir. Gənc iştirakçılarda isə belə əlaqə aşkarlanmayıb.

Beyində “düyü dənəsi” boyda sahə

Alimlər həmçinin yuxu və oyanıqlığın tənzimlənməsində iştirak edən, beyin kötüyündə yerləşən kiçik bir sahəni - mavi ləkəni (locus coeruleus) araşdırıblar.

Ölçüsü təxminən düyü dənəsi qədər olan bu struktur Altzheymer xəstəliyi zamanı patoloji zülalların toplanmağa başladığı ilk bölgələrdən biri hesab olunur.

Tədqiqat müəlliflərinin fikrincə, yuxu pozuntuları xəstəliyin klinik əlamətləri ortaya çıxmazdan xeyli əvvəl bu strukturun fəaliyyətində baş verən dəyişikliklərlə əlaqəli ola bilər.

Hələ diaqnostika üsulu deyil

Alimlər vurğulayırlar ki, söhbət hələlik yalnız statistik əlaqədən gedir və gecə mikroyanılmaları Altzheymer xəstəliyinin diaqnostik əlaməti hesab edilə bilməz.

Bununla belə, gələcəkdə yuxunun təhlili Altzheymer xəstəliyinə yüksək risk daşıyan insanları daha erkən müəyyənləşdirmək üçün sadə və əlçatan vasitəyə çevrilə bilər.

Müəllif: Adəm