Hamiləliklər arasında fasilə az olarsa... - Həkim xəbərdarlıq etdi

Hamiləliklər arasında optimal müddət qadının sağlamlıq vəziyyətindən asılıdır. Lakin doğuşdan qısa müddət sonra yenidən hamilə qalmaq orqanizmin tam bərpa olunmasına imkan verməyə bilər.

Publika.az xəbər verir ki, bunu mama-ginekoloq və reproduktoloq Marzi Abdullayeva bildirib.

Həkimin sözlərinə görə, hamiləliklər arasındakı fasilə bir ildən az olarsa, qadın orqanizmində tükənmə yarana bilər.

“Fasilə hətta bir ildən az olarsa, tükənmə baş verir. Pasiyent tam bərpa olunmur, qida maddələri çatışmaya bilər və hamiləlik daha ağır keçir”, - deyə mütəxəssis qeyd edib.

Onun sözlərinə görə, hamiləlik və ana südü ilə qidalandırma dövründə körpə üçün lazım olan qida maddələri ananın orqanizmindən alınır. Bu səbəbdən doğuşdan sonra bəzi qadınlarda diş və onurğa problemləri yarana bilər.

Həkim vurğulayıb ki, hər qadının orqanizminin bərpa potensialı fərqlidir. Güclü tükənmə zamanı orqanizm hətta yeni mayalanmaya mane ola bilər.

O, növbəti hamiləliyi planlaşdırmazdan əvvəl qadının sağlamlıq vəziyyətini nəzərə almasının və orqanizmə bərpa olunmaq üçün kifayət qədər vaxt verməsinin vacibliyini bildirib.

Adəm