Xəstə sayı şəffaf şəkildə açıqlanır, real rəqəmlərdir - TƏBİB

Bu gün ölkədə tətbiq olunan müalicə protokolları dünya təcrübəsinə əsaslanır. TƏBİB mart ayında Türkiyənin Səhiyyə Nazirliyi ilə görüş keçirib.

Publika.az xəbər verir ki, bunu TƏBİB-in İdarə Heyətinin sədri Ramin Bayramlı mətbuat konfransında deyib: "Xəstələrin sayı məlumdur. Biz bunu şəffaf şəkildə açıqlayırıq. Xəstə sayları real rəqəmlərdir. Ümid edirik ki, müalicə tədbirləri nəticəsində sağalmalarda artım müşahidə edəcəyik.

Bu gün ölkəmizdə bütün müalicə protokollarını tətbiq etmək üçün imkanlar var. Plazma müalicə üçün Hemotologiya Mərkəzi ilə müzakirələr davam edir. Bu barədə Səhiyyə Nazirliyi ilə də müzakirələr davam edir. Xəstəlikdən sağalan kəsləri Milli Hemotologiya Mərkəzinə dəvət edib, plazma müalicə üsulunu tətbiq edəcəyik. Buna növbəti həftədən başlayacağıq. COVID19 xəstəliyindən sağalan insanların qanında xəstəliyə qarşı anti-cisimlər olur. Bu plazmada anti-cisimlər yetəri qədər olarsa, bunu ağır xəstələrə köçürə bilərik. Virusun anemiyaya səbəb olması faktı da var".