Sosial

Qubadlıda hərbi qulluqçular üçün yeni yaşayış kompleksi istifadəyə verildi - FOTO/VİDEO

12 Mart 2026 16:56

Bu gün Dövlət Sərhəd Xidmətinin “Qubadlı” əlahiddə sərhəd diviziyasının N saylı hərbi hissəsində əsaslı təmirdən çıxmış 53 mənzildən ibarət ikimərtəbəli və dördmərtəbəli “Sərhədçi” yaşayış kompleksi zabit, gizir və müddətdən artıq həqiqi hərbi xidmət hərbi qulluqçularının istifadəsinə verilib.

Publika.az xəbər verir ki, bu barədə Dövlət Sərhəd Xidmətinin Mətbuat Mərkəzi məlumat yayıb.

Tədbir zamanı bildirilib ki, müasir standartlara cavab verən yaşayış binalarına su və elektrik xətləri çəkilib, mərkəzləşdirilmiş istilik sistemi quraşdırılıb, mənzillər mətbəx avadanlığı ilə təchiz olunub. Binaların həyətində sakinlərin istirahəti üçün park və idman meydançası salınıb, yaşıllaşdırma işləri görülüb, müxtəlif ağac və gül kolları əkilib, əraziyə asfalt örtük çəkilib.

Dövlət Sərhəd Xidmətinin rəisi, general-polkovnik Elçin Quliyev dövlət sərhədinin mühafizəsi və müdafiəsində fərqlənmiş hərbi qulluqçulara orden və medallar, həmçinin xidməti mənzillərin orderlərini təqdim edib, daha sonra yaşayış binalarında yaradılmış şəraitlə tanış olmub və hərbi qulluqçuların ailə üzvləri ilə görüşüb.

Sakinlər yaradılan şəraitdən məmnunluq ifadə edərək göstərdiyi ali diqqət və qayğıya görə ölkə başçısına minnətdarlıqlarını bildiriblər.

Tədbirin sonunda hərbi qulluqçular və ailə üzvləri ilə xatirə fotoşəkilləri çəkilib.