Moskva soruşur: Ermənistanı hansı fəlakət gözlədiyini anlayırsınız? - Masada bir ssenari var, reallaşarsa...

“Rusiya Cənubi Qafqaza komandanlıq etmək və Ermənistan cəmiyyətinə siyasi liderləri ilə nə edəcəyini söyləmək niyyətində deyil”.

Publika.az xəbər verir ki, bunu Rusiya XİN-in Beynəlxalq Tədqiqatlar İnstitutunun aparıcı elmi işçisi, politoloq Aleksey Tokarev “Sputnik Armenia”ya müsahibəsində deyib.

O bildirib ki, Şimali Qafqaz Rusiyanın ayrılmaz hissəsidir, Cənubi Qafqaz isə Rusiyanın milli maraqlarının birbaşa proyeksiyasıdır.

Cənubi Qafqazın və bütün postsovet məkanının qorunub saxlanmasının Rusiyanın milli maraqları dairəsində olduğunu qeyd edən ekspert, bunun heç də Cənubi Qafqaz dövlətlərinin birbaşa Moskvanın nəzarətində olması demək olmadığını vurğulayıb.

Tokarev qeyd edib ki, hazırda Rusiya tərəfi Ermənistanın nə istədiyini və erməni milli maraqlarının nədən ibarət olduğunu anlamır.

“Xarici siyasət istiqamətiniz necədir” sualına müxtəlif ictimai-siyasi qüvvələrə müraciət etsəniz, müxtəlif cavablar alacaqsınız. “Təhlükəsizliyinizi kim təmin etməlidir” sualına üç cavab alacaqsınız: İran, Fransa və Rusiya. “Qarabağda sülhməramlı olaraq qalmalısınız” sualına da müxtəlif cavablar alacaqsınız. “Siz Qarabağla bundan sonra nə etməyi planlaşdırırsınız”, burada da fərqli cavablar alacaqsınız. Ən qəribəsi odur ki, hakim gücün bir baxışı var, xalqın başqa, müxalifətin isə tamam başqa. Buna görə də Ermənistanın nə istədiyi bəlli deyil”, - ekspert vurğulayıb.

Onun sözlərinə görə, bu gün Ermənistanda İrəvanın Qarabağı tərk etmək istəməməsi ilə bağlı dəqiq konsolidə edilmiş mövqe yoxdur. Üstəlik, Ermənistanda mühüm regional məsələlərlə bağlı ümumiləşdirilməmiş fikirləri dövlət aparatının bəzi nümayəndələri və hakimiyyətə birbaşa aidiyyəti olmayan ayrı-ayrı KİV təbliğ edir. Ekspert vurğulayıb ki, lakin Moskva onların gündəminin necə formalaşdığını yaxşı başa düşür.

Rusiyalı ekspert qeyd edir ki, Moskva Ermənistan hakimiyyətinin Rusiya-Ermənistan dialoqu ilə bağlı sistemli iş görməməsindən çaşqındır.

“Ermənistan rəhbərliyi səfərləri və sənədləri koordinasiya edir, sonra isə onlar pozulur və ya pislənir ki, bu da ikitərəfli münasibətlərdə müəyyən çətinliklərə səbəb olur və müəyyən mühüm məsələlərin sonrakı irəliləyişində çətinliklər yaradır. Mən əminlik istəyirəm, suala cavab almaq istəyirəm: Qarabağda hadisələrin sonrakı inkişafını necə görürsünüz? Ermənistanın Rusiyanı sıxışdırmaq siyasəti davam edərsə, Allah eləməsin, gələcəkdə hansı böyük fəlakətə səbəb ola bilər? Ermənistan siyasi isteblişmentinin Qərbə üz tutması fonunda “Ermənistan cəmiyyəti hazırkı siyasət davam etdirərsə, Ermənistanı hansı tarixi və humanitar fəlakət gözlədiyini anlayırsınız?”, - deyə Tokarev vurğulayıb.

Rusiyalı ekspert qeyd edir ki, Rusiyada da belə bir anlayış var ki, Ermənistan öz iradəsi olan azad ölkədir, onunla danışmaq çətindir, lakin danışıqlar aparmaq lazımdır: “Ermənistan Rusiya üçün yaxın ölkədir və Rusiyada ermənilərin rolu böyükdür. Rusiya Cənubi Qafqazı itirə bilməz. Təbii ki, masada erməni elitasının bir hissəsinin irəli sürdüyü bir ssenari var: bu, xarici siyasət oriyentasiyasının dəyişməsi, Qarabağdan çıxarılması, Rusiyanın təhlükəsizlik zəmanətlərindən imtina və Rusiya hərbi bazasının çıxarılması tələbidir”, - ekspert əlavə edib.

Onun sözlərinə görə, belə bir ssenari Ermənistan və Rusiyanın milli maraqlarına tamamilə ziddir.

Akqabay