Gürcüstan QARIŞDI: Prezident sarayına BASQIN ETDİLƏR - VİDEO

Tbilisinin mərkəzində etirazçılar dəmir baryerləri aşaraq Gürcüstan Prezidentinin sarayının həyətinə soxulublar.

Bu barədə Publika.az yerli KİV-ə istinadla məlumat yayıb.

Məlumata görə, hüquq-mühafizə orqanları nümayişçilərə qarşı bibər qazından istifadə ediblər.

Bundan bir qədər əvvəl yüzlərlə avtomobildən ibarət kolonlar “hakimiyyətin dinc yolla devrilməsi” məqsədilə keçirilən etiraz aksiyalarında iştirak üçün Tbilisinin mərkəzinə doğru hərəkət ediblər. Bildirilir ki, mitinqə qatılmaq üçün ölkənin qərbində yerləşən Acarıstan bölgəsinin sakinləri yola çıxıblar. Bundan əlavə, bəzi fəallar Gürcüstanın paytaxtına yaxın yerləşən Qori şəhərində dayanaraq birgə Tbilisiyə getməyə qərar veriblər.

Etirazçıların fəallığı ilə əlaqədar olaraq Tbilisinin mərkəzinə çox sayda təhlükəsizlik qüvvələri göndərilib.

Gürcüstanda yerli özünüidarəetmə orqanlarına seçkilər 4 oktyabrda respublikanın 64 bələdiyyə və rayonunda eyni vaxtda keçirilir. Səsvermənin nəticələrinə əsasən Tbilisi, Kutaisi, Batumi, Rustavi və Poti şəhərlərinin merləri, 59 bələdiyyənin rəhbərləri və yerli şəhər məclislərinin deputatları seçiləcək.

Hüseyn İbadlı