Paşinyan Göyçə gölü ilə bağlı Əliyevə haqq qazandırdı - “Sevan” adı yoxdur

Ermənistanın baş naziri Nikol Paşinyan Prezident İlham Əliyevin “Sevan gölü”nün Göyçə gölü olduğu haqda fikirlərinə münasibət bildirib.

Publika.az xəbər verir ki, Paşinyan Prezident İlham Əliyevin xəritələrə əsasən belə dediyini vurğulayıb.

“Azərbaycan Prezidenti bəyan edib ki, Çar Rusiyasının xəritələrinə baxsaq, orada “Sevan” adı yoxdur. Əvvəlcə Əliyevin nə dediyinə baxmaq lazımdır. O, Sevanı Göyçə adlandırmır, deyir ki, Çar Rusiyasının xəritələrində Sevan adı yoxdur”.

Paşinyan Prezident İlham Əliyevin fikirlərinə dolayısı ilə haqq qazandırıb və günahın Ermənistanda olduğuna işarə vurub.

“Azərbaycan tərəfi Ermənistan parlamentində niyə “Dağlıq Qarabağın bayraqlarının” asıldığını soruşur və bildirirlər ki, əgər belədirsə, biz də Sevana Göyçə deyəcəyik”, - Nikol vurğulayıb.

Qeyd edək ki, Prezident İlham Əliyev AMEA-nın 80 illik yubileyinə həsr olunmuş yığıncaqda çıxışı zamanı Azərbaycanın tarixi torpaqlarından bəhs edib.

“XX əsrin əvvəllərində çar Rusiyası tərəfindən dərc edilmiş xəritələrə baxmaq kifayətdir hər kəs görsün ki, indiki Ermənistan ərazisində toponimlərin mütləq əksəriyyəti Azərbaycan mənşəlidir. O xəritələrdə Sevan gölü adlı göl yoxdur. O xəritələrdə Göyçə gölüdür və bütün digər bizim istifadə etdiyimiz tarixi toponimlərimiz orada öz əksini tapıb. O xəritələri biz tərtib etməmişik ki, kimsə desin biz burada saxtakarlıq eləyirik. Bunu çar Rusiyası edib. Həmin o çar Rusiyası ki, vaxtilə erməniləri İrandan və Şərqi Anadoludan gətirərək bizim Qarabağ torpağında yerləşdirib ki, burada etnik və dini tərkib dəyişsin. Yəni, bu xəritələr tamamilə tarixi həqiqətə əsaslanan xəritələrdir”, - dövlət başıçısı bildirib.

Asif