Saakaşvilinin HƏBSXANA HƏYATI - Yalnız bir Azərbaycan kanalı..

Gürcüstanın sabiq prezidenti Mixeil Saakaşvili tibbi müəssisədən yenidən həbsxanaya qaytarıldıqdan sonra kamerada yalnız rusiyalı telekanalların yayımlandığını bildirib.

Publika.az xəbər verir ki, siyasətçi bunu "Facebook" səhifəsində yazıb.

“Bu dəfə həbsxana tamamilə doludur. Ardımca əvvəlkindən daha çox həbsxana mühafizəçisi gəlir. Və daha bir diqqətəlayiq məqam: kameramdakı televizorda yalnız bir Azərbaycan kanalı istisna olmaqla, Rusiya kanalları göstərilir.”, – deyə siyasətçi vurğulayıb.

Gürcüstanda Saakaşviliyə qarşı beş cinayət işi qaldırılıb. Bunlara deputat Gelaşvilinin döyülməsi, dövlət vəsaitlərinin mənimsənilməsi, 2007-ci ildə etiraz aksiyasının dağıdılması və sərhədi qanunsuz keçmə işi daxildir. Məhkəmə qərarlarına əsasən, Saakaşvili 2034-cü ilə qədər cəzasını çəkməlidir.

Gürcüstan Penitensiar Xidməti daha əvvəl Saakaşvilinin həbsxanaya qaytarıldığını, bunun onun səhhətinin yaxşılaşması ilə izah olunduğunu açıqlamışdı. Saakaşvili 2022-ci ilin mayından həbsdən sonra başladığı uzunmüddətli aclıq aksiyası səbəbindən klinikada saxlanılırdı.

Hüseyn İbadlı