Təyyarələr İrəvana enə və ya qalxa bilmir: Nə baş verib?

Ermənistanın “Zvartnots” beynəlxalq hava limanı əlverişsiz hava şəraiti səbəbindən bir neçə aviareysi qəbul edə bilməyib.

Publika.az xəbər verir ki, “Fly Dubai”, “Şirak Avia” və “Air Arabia” aviaşirkətlərinə məxsus Dubay, Moskva və Əbu-Dabidən gələn təyyarələr məcburi şəkildə Tbilisi hava limanına eniş ediblər. Bu barədə məlumatı “Zvartnots” hava limanının mətbuat katibi Lusine Moqrovyan “Sputnik Ermənistan”a verib.

Qeyd edilir ki, Larnaka, Dubay, Əbu-Dabi və Yekaterinburqdan gələn təyyarələr də eyni səbəbdən enişdə çətinliklərlə üzləşib. Moqrovyan bildirib ki, uçuş cədvəlindəki dəyişikliklər sıx dumanla əlaqədardır və bu, eniş üçün görünüş məsafəsini əhəmiyyətli dərəcədə azaldıb.

Səhər saatlarından etibarən İrəvandan yalnız "Air France" şirkətinin reysi havaya qalxa bilib. Digər uçuşlar hava şəraiti yaxşılaşana qədər gözləmə rejimində saxlanılır.

Mətbuat katibinin sözlərinə görə, hazırda 10-dək təyyarə “Zvartnots” hava limanına eniş üçün şəraitin yaranmasını gözləyərək havada dövrə vurur.