Pakistan Ermənistanda səfirliyini açacaq

Ermənistan və Pakistanın diplomatik nümayəndələri Pakistanın İrəvanda səfirliyinin açılması istiqamətində fəal danışıqlar aparırlar.

Publika.az xəbər verir ki, bu barədə news.am məlumat yayıb.

Diplomatik mənbələrin bildirdiyinə görə, səfirliyin açılması gələn ilə planlaşdırılır.

Mövzu ilə bağlı Ermənistan Xarici İşlər Nazirliyinə göndərilən sorğuya verilən rəsmi cavabda məlumat təkzib edilməyib. XİN-in açıqlamasında qeyd olunub ki, iki ölkə arasında diplomatik münasibətlərin qurulmasına dair birgə kommünikenin imzalanması tərəflərin qarşılıqlı əsasda nümayəndəlik açmasına imkan yaradır.

“Diplomatik münasibətlərin qurulması haqqında birgə kommünike ilə Ermənistan və Pakistan hökumətləri nümayəndə mübadiləsinə və bu prosesin həyata keçirilməsi üçün bütün lazımi dəstəyin göstərilməsinə razılıq veriblər. Gələcək addımlar barədə ictimaiyyətə əlavə məlumat veriləcək”, - deyə Ermənistan XİN-in cavabında bildirilir.

Qeyd edək ki, Ermənistan və Pakistan arasında diplomatik münasibətlər 2025-ci il avqustun 31-də Çində imzalanmış sənədlə rəsmiləşdirilib.