Paşinyan Putinə gizli mesajlar ötürür - İrəvan “kölgə diplomatiyasını” işə saldı

Paşinyan hakimiyyəti “kölgə diplomatiyası” mexanizmi ilə Rusiyanın dəstəyini əldə etməyə çalışır.

Publika.az xəbər verir ki, bu barədə Ermənistan mediası diplomatik mənbələrə istinadən məlumat yayıb.

Diplomatik mənbə bildirir ki, İrəvan Moskvaya Rusiya-Ermənistan münasibətlərində narahatlığa əsas olmadığı mesajlarını çatdırır.

“Birincisi, Gümrüdəki bazanın çıxarılması planının olmadığını, ikincisi, KTMT ilə münasibətlər gərgin olsa belə, NATO-ya inteqrasiyanın da gündəmdə olmadığını çatdırırlar. Sadəcə olaraq, mövcud şərtlərdə bütün xarici oyunçularla yaxşı münasibətlər saxlamaq məcburiyyətində olduqlarını deyirlər”, - mənbə bildirir.

Lakin Rusiya Paşinyanın hakimiyyətə gəlişindən sonra eşitdiyi “əhvalatlara” inanmaq niyyətində deyil. Mənbə bildirir ki, Moskvada Paşinyanın seçkilərə görə belə mövqe sərgilədiyinə əmindirlər: “Məqsəd Rusiyanın seçkiyə müdaxiləsinin qarşısını almaqdır”.

Mənbə onu da bildirir ki, Rusiyada Ermənistanın mesajlarına hələlik dəqiq cavab verilməyib.

“Rusiya hazırda əsas diqqətini Ukraynaya yönəldib. Moskvada ümid edirlər ki, Ukrayna məsələsi dekabr ayının sonuna qədər olmasa belə, gələn ilin yazına qədər həll olunacaq. Ermənistanla bağlı qərarlar da həmin vaxt veriləcək”, - mənbə qeyd edir.

Asif