ABŞ İsrailə qırıcı təyyarələr yerləşdirir

ABŞ Böyük Britaniyadan İsrailin hərbi hava bazasına 10-dan çox "F-22" çoxməqsədli qırıcı təyyarəsi göndərib.

Publika.az xəbər verir ki, bu barədə "The Times of Israel" (TOI) məlumat yayıb.

Nəşrin məlumatına görə, krallığın şərqindəki "Leykenhit" aviabazasından 12 qırıcı havaya qalxsa da, onlardan biri texniki nasazlıq səbəbindən geri qayıdıb. Qeyd olunub ki, təyyarələr Britaniyaya ötən həftə gəliblər.

Fevralın 17-də Vaşinqton və Tehran arasında nüvə danışıqlarının ikinci raundu heç bir irəliləyiş olmadan başa çatdıqdan sonra, ABŞ-ın Avropa və Yaxın Şərqdəki bazalara 150-dən çox təyyarə köçürərək İran yaxınlığındakı mövcudluğunu artırıb.

Fevralın 23-də Yunanıstanın Krit adası sahillərində müşahidə edilən "USS Gerald R. Ford" hərbi gəmisinin göyərtəsində onlarla əlavə təyyarə var. "Ford" Yaxın Şərqə göndərilən ikinci aviadaşıyıcıdır və onun gəlişi o deməkdir ki, hazırda ABŞ-ın fəaliyyətdə olan bütün gəmilərinin təxminən üçdə biri bu regiondadır.

Hüseyn İbadlı