Dünya

II Dünya müharibəsindən qalan bombaya görə 16 min sakin köçürülür

19 İyul 2015 20:14

Hannoverin şimalında, Lanhenhagen şəhərində İkinci Dünya müharibəsindən qalmış 3 partlamayan bombanın zərərsizləşdirilməsi üçün 16 minə yaxın sakin evakuasiya edilir.

Axar.az Ria-Novosti-yə istinadla xəbər verir ki, evakuasiya yerli vaxtla saat 9:00-dan başlayıb. Hər şey plan üzrə gedərsə, bu gün axşam dəmiryol nəqliyyatının hərəkəti bərpa ediləcək.

İkinci Dünya Müharibəsi zamanı Hannover şiddətli bombardmana məruz qalıb. Təkcə 1943-cü ildə şəhərə 261 min bomba atılıb.

Hər il Almaniyada 5,5 min partlamamış bomba zərərsizləşdirilir. Bütün müharibə ərzində Almaniyaya 2 milyondan artıq bomba atılıb, onlardan təxminən 100 mini partlamayıb. Ən çox bombardmana isə Berlin (68 tondan çox), Hamburq (45 ton), həmçinin Rur əyaləti (162 ton) məruz qalıb.