Ermənistanda deputatı şantaj edən baş redaktor tutuldu

Ermənistanda sayt rəhbəri fırıldaqçılıqda şübhəli bilinir.

AzNews.az erməni KİV-lərinə istinadən xəbər verir ki, “analitik.am” saytının rəhbəri millət vəkilindən pul tələb etməkdə şübhəli bilinərək saxlanılıb.

Məlumata görə, ölkə parlamentinin deputatlarından biri Baş mütəşəkkil cinayətkarlıqla mübarizə idarəsinə müraciət edərək “analitik.am” informasiya saytının qadın direktorunun ondan pul tələb etdiyini bildirib. Deputatın sözlərinə görə, saytda vaxtaşırı onun və ailəsinin ünvanına yalan və böhtan dolu məlumatlar yerləşdirilib. Eləcə də saytda onun deputat kimi fəaliyyəti barədə yalan məlumatlar yer alıb.

Bununla əlaqədar saytın direktoru deputatla görüşərək yazıların dayandırılması müqabilində hər ay 300 000 dram ödəməyini tələb edib. Daha sonra danışıqları direktorun köməkçisi aparmağa başlayıb. Məhz deputatla direktorun köməkçisi arasında razılıq əldə olunub. Razılaşmaya əsasən, hər ayın 5-nə kimi deputat direktora və ya onun köməkçisinə 300 000 dram ödəməli olub. Mayın 3-də Ermənistan polisinin mütəşəkkil cinayətkarlıqla mübarizə idarəsinin əməkdaşlarının əməliyyat istintaq tədbirləri nəticəsində kafelərin birində direktor və onun köməkçisi pulu alarkən saxlanılıb. Hazırda faktla bağlı istintaq aparılır.