“Hədəf Ecevit, Abdullah Gül və Ərdoğan olub” – Son qərar

“Ərgenekon” iddiasının 16 min 600 səhifəlik səbəbli qərarı Milli Məhkəmə Şəbəkəsinin informasiya sistemində (UYAP) təsdiqlənib.

Publika.Az – ın Türkiyə mediasına istinadən verdiyi məlumata görə, qərarda “fərqli adların olmasına baxmayaraq, “Ərgenekon” terror təşkilatının silahlı bir təşkilat olduğu müəyyən edilmişdir” ifadəsi yer alıb.

Qərarda “Ərgenekon” terror təşkilatının Bülent Ecevit hökuməti ilə Abdullah Gül və Rəcəb Təyyib Ərdoğan hökumətini hədəf aldığı vurğulanıb.Qərarda 20 Oktyabr 2008-ci ildə istintaq prosesi başlayan “Ərgenekon” silahlı terror təşkilatı iddiasının 5 Avqust 2013-cü ildə başa çatdığı xatırlanıb.

“Məhkəmə prosesinin sonunda “Ərgenekon” adlanan bir təşkilat olduğu, təşkilatın silahlı bir terror təşkilatı xüsusiyyətlərini daşıdığı, silahlı terror təşkilatının əsasən Türkiyə Silahlı Qüvvələri daxilində qeyri-qanuni yaradılaraq fəaliyyət göstərdiyi, hərbi və mülki olmaqla cəmiyyətin hər seqmentindən üzvlərinin olduğu müəyyənləşdirilmişdir”, - UYAP-ın qərarında qeyd olunub.

Ömər Dağlı