• USD 1,7339 0,00% EUR 1,8651 +1,90%
    • GBP 2,2098 +0,44% RUB 0,0271 +0,37%

Nalbandyanı susduran azərbaycanlı xanım: “Sualı eşidəndə rəngi ağardı” – ÖZƏL

  • Nida.az
  • 11 Dekabr 2014 15:08
  • 1 954 Baxış
Nalbandyanı susduran azərbaycanlı xanım: “Sualı eşidəndə rəngi ağardı” – ÖZƏL

İsveç-Azərbaycan Gənclər Təşkilatının (SUA) həmsədri Mahirə Muxtarlı Publika.az-a açıqlamasında Stokholmda Ermənistan xarici işlər naziri Eduard Nalbandyanı susdurmasından danışıb.

Mən Azərbaycanın Ermənistan tərəfindən işğal olunmuş Kəlbəcər rayonunda doğulmuşam. Kiçik yaşlarımdan müharibənin dəhşətini və ağır qaçqın həyatını yaşamışam. Hazırda SUA-nın həmsədriyəm. Beynəlxalq və Avropa əlaqələri üzrə təhsil almışam. Təşkilatımızın fəaliyyət istiqamətində fəal olan, İsveçdə təhsil almış ən azı beş dil bilən gənclərimizdən ibarət heyətimiz var. Həmçinin təşkilatımız gənclər sektorunda Azərbaycanla və regional əməkdaşlığa da üstünlük verir. İsveçdə Azərbaycan həqiqətləri, Dağlıq Qarabağın işğalı ilə bağlı geniş təbliğat aparırıq”, - deyə M. Muxtralı əvvəlcə özü və fəaliyyəti haqda məlumat verib.

- Mahirə xanım, İsveçdə çıxışınız zamanı Ermənistan XİN rəhbəri Nalbandyanın qarşısında faktlar qoyanda onun üz ifadəsi necə idi?
- Ermənistanın XİN rəhbəri Stokholm Sülh Araşdırma İnstitutunda “Qafqazda Təhlükəsizlik Problemləri” mövzusunda çıxış etməli idi. Lakin çıxışının əsas hissəsi Azərbaycanı qaralamaq, Ermənistanın “inkişafı”, “ermənilərin soyqırımı” və s. məsələlər oldu. Çıxışı zamanı məndə elə fikir yarandı ki, sanki nə dediyinə özü də inanmır və kağızda yazılıb deyə auditoriyaya bu məlumatı çatdırmalıdır. Regionda inkişaf etmiş Azərbaycan və Türkiyə kimi dövlətləri savadlı və tədqiqatçı auditoriyanın qarşısında qaralamaq və məsələlərə birtərəfli yanaşaraq çıxış etməyin məsuliyyəti çıxışı zamanı onun intonasiyasında müəyyən maneələr yaradırdı. Onun üz ifadəsi ilk olaraq bizim gənclərin sualları zamanı dəyişdi. Gənclərin sualları zamanı eşidilən Qarabağ müharibəsi ilə bağlı faktlar artıq onu əsəbiləşdirməyə başlamışdı. Bir müddət sonra isə uşaqlıq günləri əlindən alınmış, doğma yurdu işğal olunmuş, ailəsi bu müharibə nəticəsində çətinliklərlə qarşılaşmış və bunlara şahid olmuş bir uşağın və indi qarşısında duran bir gəncin bu yaşadıqları üçün “sizdə ədalət varmı?” deməsi artıq nazirin rəngini dəyişdirdi və daha diplomatik cavablar verə bilmədi.


- Nalbandyan belə mənzərə ilə qarşılaşacağını gözləyirdimi?
- Tədbir başlamazdan bir qədər əvvəl erməni diplomatları iki-üç gəncimizi görüb tədbirdə azərbaycanlıların olacaqlarını bilirdilər. Bilmədikləri isə zalın müxtəlif hissələrində gözlədiklərindən çox azərbaycanlı gəncin olması idi. Nazirin “Zalın 90 faizindən çoxu azərbaycanlıdır“ deməsi vəziyyətin onun üçün gərgin olduğunu əks etdirdi.


- Erməni nazirlə birgə gələn erməni nümayəndə heyətinin reaksiyası necə oldu, onlar nə edirdilər?
- Mənim diqqətimi çəkən bir məsələ oldu. Erməni diplomatik korpusunun nümayəndələri qarşı tərəfdə oturmuşdular. Nazir “erməni soyqırımı” haqqında danışanda qarşıda oturan diplomatlar geriyə, zaldakı auditoriyaya baxırdılar. Elə bil zaldan hansısa reaksiya gözləyirdilər. Digər bir hadisə isə diplomatlardan birinin tədbir qurtarar- qurtarmaz məni sorğu-suala tutması idi. Hansi məktəbə getmisən? Orda nə var idi? Həqiqətən qarabağlı olduğumu öyrənməyə çalışırdı.


- İsveçdə Azərbaycanı hansı səviyyədə tanıyırlar?
- Regional yanaşma baxımdan Azərbaycan İsveçdən bir qədər uzaqda yerləşdiyinə görə ölkə haqqında daha geniş məlumatları yoxdur. Siyasi mövqedən yanaşsaq, Azərbaycan Rusiya Federasiyasının qonşuluğunda yerləşən və Avropa Birliyinin qonşuluq siyasətində olan dövlətdir. Bu baxımdan, bəzi iş adamlarında Azərbaycan maraq yarada bilir. Ölkəmizin zənginliyinin İsveçdə tanınması bizim təşkilatın prioritet sahələrindən biridir. Bu sahədə Azərbaycanın İsveçdəki səfiri cənab Adış Məmmədovun başçılığı ilə səfirlik silsilə tədbirlər təşkil edilir və eyni zamanda, bizim təşkilata da dəstək olurlar.


- Azərbaycan haqda məlumatları İsveç ictimaiyyətinə necə çatdırırsınız, hansı işlər görürsünüz?
- Fəaliyyətimizin ən başlıca istiqamətlərindən biri isveçlilərlə və onların işlədikləri cəmiyyətlərlə əlaqələri quraraq, Azərbaycanı təbliğ etməkdir. Bu əlaqələr həyata keçirdiyimiz layihələr, tədbirlər və şəxsi tanışlıqlar – məsələn, universitet yoldaşları, müəllimlər və ya iş yoldaşları - vasitəsilə də həyata keçirilir. İsveçdə olan azərbaycanlı yaşlı nəsillə müqayisədə gənclər yerli cəmiyyətlə daha asan əlaqələr qura bilir. Bunun birinci səbəbi gənclərin İsveçdə ali təhsil alması və ömürlərinin əsas hissəsini bu ölkədə yaşamaqdırsa, ikincisi, yerli mədəniyyəti, etik normaları yaxşı bilmələri və loru dildə desək, isveçlinin öz “dilində” məsələlərə yanaşmasıdır.


Asif Nərimanlı

Xəbər lenti

DAHA ÇOX XƏBƏR