İnzibati xətaya görə saxlanılanlara şad xəbər: İmtiyazlar artırılır

Azərbaycanda Ombudsman Aparatı və Daxili İşlər Nazirliyi (DİN) inzibati xətaya görə saxlanılan şəxslərlə bağlı yeni təkliflər hazırlayıb.

Bunu AzNews.az-a açıqlamasında Ombudsman Aparatının İşgəncələrin qarşısının alınması şöbəsinin müdiri və Milli Preventiv Qrupunun rəhbəri Vüqar Məhərrəmov deyib. Onun sözlərinə görə, təkliflərdə inzibati xətaya görə saxlanılan şəxslərin yaxınları ilə görüşlərin və telefon danışıqlarının sayının artırılması qeyd olunub: “Hazırda onlara 15 gündən bir yaxınları ilə görüş verilir. Biz tərəfdarıyıq ki, həbs olunanlara həftədə 1-2 dəfə görüş verilsin".

Vüqar Məhərrəmovun açıqlamasına görə, sözügedən paketdə inzibati qaydada saxlanılan şəxsləri sevindirəcək daha bir təklif var. O, cinayət törədən şəxsləri inzibati qaydada həbs olunanları müqayisə edərək bunları deyib: "Ölkə qanunvericiliyinə əsasən, cinayət törədən şəxslər saxlanıldığı kamerada televizora baxa bilər. Nəyə görə inzibati qaydada saxlanılan şəxslər bu imkanlardan istifadə etməsin? Biz bununla bağlı da öz fikirlərimizi paketə əlavə etmişik. Yaxın vaxtlarda Daxili İşlər Nazirliyinə göndəriləcək. Güman edirəm ki, bütün bunların əsasında uğurlu bir əsasnamə hazırlanacaq”.