Orucu neçə yaşından tutmaq vacibdir?

Oruc tutmaq üçün yaş meyarı şəriətə görə, həddi-büluğ (yetkinlik) yaşı sayılır. Bütün məzhəblərə görə, oğlanlar ehtılam (sperma gəlməsi), qızlar isə heyz (aybaşı) gördüyü zaman yetkin sayılırlar.

Şafii, maliki, hənbəli və cəfəri məzhəbləri qarnın aşağı hissəsində cod tüklərin bitməsini də həddi-büluğun əlaməti sayırlar. Əgər göstərilən fiziki əlamətlər görünmürsə, onda yetkinliyi yaşla hesablayırlar. Şafii və hənbəli məzhəblərinə görə, həm qız, həm də oğlan uşaqları 15 yaşından, maliki məzhəbində 17 yaşından gec olmayaraq yetkinləşirlər. Hənəfi məzhəbində bu hədd qızlar üçün 17, oğlanlar üçün 18 yaşdır. Şiə məzhəbinə görə isə yuxarıdakı fiziki əlamətlər müşahidə edilməsə, qız qəməri təqvimlə 9 yaşına, oğlan isə 15 yaşına çatanda yetkin sayılır.

Bəzi müasir cəfəri alimləri yetkinlikdə yaşı deyil, ehtilam və heyzi şərt bilirlər. Bəzi başqa müasir cəfəri alimləri isə cinsindən asılı olmayaraq, uşaqların 13 yaşdan oruc tutmasını vacib bilirlər. (islam.az)