Paytaxta hücum əmrinə yaşıl işığı o yandırıb - Ağ evdəki sirr açıldı

Ağ evin sabiq milli təhlükəsizlik üzrə müşaviri Con Bolton Liviyanın qiyamçı generalı Xəlifə Haftara paytaxt Tripolinin işğalı üçün yaşıl işıq yandırıb.

Publika.az xəbər verir ki, bu iddia “New York Times” qəzetinin Devid Kirkpatrik imzalı məqaləsində yer alıb.

Bildirilib ki, Haftar Tripoliyə hücum etməzdən əvvəl Con Boltona zəng vurub. Haftar həmin danışıqda qarşı tərəfdən “yox” cavabı almayıb. Lakin həm Haftar, həm də ABŞ tərəfindən həmin telefon danışığı ilə bağlı bilgiləndirilən 3 qərbli diplomat Boltonun “hücum edəcəksənsə, tez hərəkətə keç” dediyini, bunun üstüörtülü şəkildə razılıq əlaməti kimi başa düşüldüyünü bildirib.

Xəbərdə qeyd olunub ki, Ağ evin Liviyadakı ikili standart tətbiq etməsi təkcə beynəlxalq aləmdə deyil, Vaşinqtonda da qarışıqlığa və təəccübə səbəb olub.

Qeyd edək ki, Liviyanın şərqindəki silahlı qüvvələrin lideri Xəlifə Haftar 4 aprel 2019-cu ildə paytaxt Tripoliyə hücum əmri vermişdi. Hazırda BMT-nin tanıdığı Milli Barışıq Hökuməti ilə Haftar qüvvələri arasında müharibə davam edir.

Con Bolton isə Ağ evdəki vəzifəsindən ötən ilin sentyabrında istefa verib.

Zümrüd