SEPAH-a ağır zərbə: ABŞ İranı belə cəzalandırdı

ABŞ Ticarət Nazirliyi İrandan olan 7 təşkilatı “Rusiya Silahlı Qüvvələrinə və onun hərbi-sənaye kompleksinə yardım etdiyinə görə” qara siyahıya salıb.

Publika.az xəbər verir ki, müvafiq bildiriş bu gün ABŞ hökumətinin rəsmi sənədlər toplusunun Federal Reyestrinin elektron bazasına daxil olub.

Siyahıya, xüsusən də aviasiya sənayesinin bir neçə müəssisəsi, həmçinin İslam İnqilabı Keşikçiləri Korpusunun (SEPAH) Hərbi Hava Qüvvələri daxil edilib.

“Bu yeddi təşkilat ABŞ hökuməti tərəfindən Rusiya Silahlı Qüvvələrinə və onun hərbi-sənaye kompleksinə yardımda ABŞ-ın milli təhlükəsizliyi və ya xarici siyasətinin maraqlarına zidd fəaliyyət göstərdikləri üçün müəyyən edilib”, - sənədin mətnində qeyd edilib.

Amerika tərəfinin fikrincə, siyahıda olan təşkilatlar Ukraynada istifadə üçün Rusiyaya verilən İran pilotsuz təyyarələrinin istehsalı ilə Rusiya Silahlı Qüvvələrinə və onun hərbi-sənaye kompleksinə töhfə veriblər.

Qara siyahıya düşmək həmin təşkilatlara qarşı ixrac nəzarəti tədbirlərinin tətbiqi deməkdir. Bu halda, qida və dərman istisna olmaqla, ixrac nəzarətinə məruz qalan bütün mallara ixrac lisenziyasının verilməsindən imtina siyasəti tətbiq olunacaq.

Akqabay