Hollivud ulduzlarının mülkləri alovlar içərisində: Paris Hiltonun evi yandı - FOTO

Məşhur amerikalı teleaparıcı, aktrisa və model Paris Hiltonun Malibudakı evi Kaliforniyanın Los-Anceles şəhərində tüğyan edən yanğın nəticəsində tamamilə yanıb.

Publika.az xəbər verir ki, bu barədə TMZ portalı yazır.

Portalın mənbələrinin məlumatına görə, Hiltonun evi yanıb və onu bərpa etmək mümkün deyil. Qeyd olunur ki, model orada daimi yaşamayıb: “Hiltonun Malibu çimərlik evi yanan dağıntı yığınına çevrildi. Bu, onun əsas iqamətgahı deyil, lakin bu, Hilton üçün böyük itkidir”.

Kaliforniya Yanğınsöndürmə İdarəsi bildirir ki, Los-Ancelesdəki yanğınların ümumi sahəsi təxminən 11 min hektara çatıb. Yanğın mindən çox binanı məhv edib, azı 5 nəfər həlak olub.

Güclü küləklər və davam edən quraqlıq səbəbindən yanğın amerikalı məşhurların yaşadığı yüksək səviyyəli "Pacific Palisades" məhəlləsinə yaxınlaşıb. 250 minə yaxın insan işıqsız qalıb. Sakinlər təxliyə edilir. Kaliforniyada fövqəladə vəziyyət elan edilib. Co Bayden yanğın səbəbindən İtaliyaya səfərini təxirə salıb.