Bu tamaşaya hər yaşda baxmaq olar!

Bu gün axşam saat 19:00-da M Teatrında teatrında "Yad Qadının məktubu" tamaşası nümayiş olunacaq.

Publika.az xəbər verir ki, yazıçı Stefan Sveyqin “Yad qadının məktubu” adlı məşhur novellası əsasında hazırlanan səhnə əsərinə bu dəfə Xalq artisti, M Teatrının direktoru Vidadi Həsənov quruluş verib. Teatrın direktoru bildirib ki, bu tamaşaya hər yaşda və hər başda baxmaq olar.

Baş rollarda Günəş Mehdizadə ilə Vüqar Hacıyevin oynadığı tamaşanın səhnə tərtibatçısı Ülkər Əliyeva, bəstəkarı isə Röya Hüseynovadır.

Məlumat üçün bildirək ki, yazıçının 1920-ci illərin əvvəlində qələmə aldığı novella məktub şəklindədir. Məşhur yazıçıya aşiq olan gizli aşiq məhəbbətini məktubda ifadə edərək yazıçını heyrətləndirir. Novella məşhur roman ustası R.-in ona gələn məktubları yoxlaması ilə başlayır və bir qadının məktubu ilə davam edir. Məktubunda qadın: "Ey məni tanımayan və daima sevdiyim insan, sən" deyə sevdiyinə müraciət edir. Qadının 13 yaşından ona duyduğu saf məhəbbət, 16 yaşında ailəsi ilə başqa yerə köçməsi, lakin bu məhəbbətsiz yaşaya bilmədiyi üçün 18 yaşında yenidən Vyanaya qayıtması, bir-biriləri ilə tanış olmaları məktubda təsvir olunur. Əsas hadisələr də bundan sonra başlayır.