Əhməd Cavadın 130 illiyinə həsr olunmuş film təqdim olundu - VİDEO

Görkəmli Azərbaycan şairi, tərcüməçisi və professoru Əhməd Cavadın 130 illiyinə həsr olunmuş qısametrajlı film təqdim olunub.

Publika.az xəbər verir ki, ekran işi Mənəvi Dəyərlərin Təbliği Fondunun sifarişi, "Admedia" agentliyinin təşkilatçılığı, həmçinin "Asan Radio"nun direktoru Emin Musəvinin ideyası əsasında məşhur aktyor Sənan Əlləzin prodüserliyi ilə həyata keçirilib. Ssenarisi Gəray Həsənov, Sənan Əlləz və Cəmil Əhmədova aid olan layihənin rejissorluğu da Gəray Həsənova həvalə olunub.

Rollarda Xalq artisti Şamil Süleymanlı, Ötkəm İsgəndərov, Gülər Nəbiyeva, Flora Hüseynova, Anar Əliyev, Ruhiyyə Yusifova, Əliyunus Babazadə, Nurlan Mürsəlzadə, Sənan Əlləz çəkilib. Uşaqları isə Səyyad Mikayılov, Amil Əhmədzadə səsləndirib.

"Azərbaycan Respublikasının Dövlət Himni Azərbaycan dövlətinin, onun müstəqilliyinin və suverenliyinin rəmzlərindəndir" başlığı altında təqdim olunan layihədə qeyd olunub ki, bu müqəddəs səda dünyadakı 50 milyondan çox azərbaycanlını birləşdirən, həmrəy edən milli və mənəvi dəyərdir.

Məlumat üçün bildirək ki, Azərbaycan Respublikasının Dövlət himninin mətninin görkəmli Azərbaycan şairi Əhmədə Cavada məxsusdur. Ümumiyyətlə, şairin yaradıcılığında bayraq mövzusuna həsr olunmuş şeirləri xüsusi yer tutub.