Cehutyemnaxtın məzarı tapıldı: Təlatümlü dövrə işıq salacaq

Misirin Abusir nekropolunda fironların son dövrü – eramızdan əvvəl VI əsrə aid sərdabə aşkalanıb.

Publika.az “Əl Əhram” nəşrinə istinadla xəbər verir ki, nekropolda ən son tapıntı Çarlz Universitetinin İncəsənət fakültəsi və Çexiya Misirşünaslıq İnstitutunun birgə arxeoloji missiyası tərəfindən həyata keçirilib. Arxeoloji qrup eramızdan əvvəl VI-V əsrlərdə - fironların son dövründə yaşamış ali rütbəli məmur Cehutyemnaxtın məzarını tapıb.

Misirin Qədim Abidələr Ali Şurasının baş katibi Mustafa Vəziri bildirib ki, sərdabənin ilk dəlili may ayında fironların son dövrü sülalələrinin yüksək rütbəli məmurları və hərbi komandirlərinin qəbiristanlığında aşkar edilib. “Bu şaxta qəbirlər həmin dövrə xas türbə növünü təmsil edir və qədim Misir elitası tərəfindən eramızdan əvvəl III minilliyin piramida quruculuğu dövrünün məşhur Köhnə Krallığının banisi Kral Djoserin məzarını təqlid edərək yaradılıb”, -deyə baş katib vurğulayıb.

Arxeoloji ekspedisiyanın direktoru Miroslav Verner qeyd edib ki, sərdabənin yerin səthində yerləşən yuxarı hissəsi artıq antik dövrdə dağıdılıb.

Abusirdə iyirmi ildən artıqdır ki, fironların son dövrünün şaxta qəbirlərinin qazıntılarını koordinasiya edən Ladislav Bareş deyib ki, "bu yeni tapıntı Misirdə eramızdan əvvəl VI-V əsrlərdə baş verən təlatümlü tarixi dəyişikliklərə daha çox işıq salacaq". (Azərtac).