Bakıda qəhqəhə: Türk Dünyasının ilk Yumor Festivalı keçirildi

Mədəniyyət Nazirliyinin dəstəyi ilə Nizami Kino Mərkəzində ilk dəfə Türk Dünyasının Yumor Festivalı təşkil olunub.

Publika.az xəbər verir ki, festivalın əsas məqsədi qarşılıqlı mədəni inteqrasiya, təcrübə mübadiləsi, yaradıcı və peşəkar qarşılıqlı fəaliyyət, inkişaf yolunda möhkəmlənmə, şou-biznes sahəsində birgə beynəlxalq yaradıcılıq layihələrinin ərsəyə gələrək təqdim olunmasıdır.

TÜRKSOY-un baş katibinin müşaviri Kayrat Mukanov çıxış edərək bildirib ki, Türk Dünyasının Yumor Festivalı ilk dəfədir keçirilir. Festivalın məhz Azərbaycanda keçirilməsi sevindirici haldır.

Festivalda Azərbaycan, Türkiyə, Qazaxıstan, Qırğızıstan, Özbəkistan və Tatarıstandan yumor sahəsini təmsil edən yaradıcı sənayenin tanınmış simaları iştirak ediblər. Türk dünyasının yumor ustaları “stand-up” janrında çıxış ediblər. Yumor ustaları öz bacarıq və istedadlarını nümayiş etdiriblər.

Münsiflər heyətinin qərarına əsasən, Tatarıstanı təmsil edən Kazan "stand-up" klubunun üzvü Bulat Xanmurzin qalib adını qazanıb. Qalibə festivalın kuboku təqdim edilib.

Cəmilə