Coşqun Rəhimov: "Öz qonaqlarımız da həyəcanlandı, "oyun"u çıxaran rəqqaslar idi"

Respublikanın Əməkdar artisti Coşqun Rəhimov "Bu Şəhərdə - Plastik Əməliyyat" adlı konsert proqramında baş verən səhnəyə münasibət bildirib.

Publika.az xəbər verir ki, o, Teleqrafa-a açıqlamasında konsert proqramından əvvəl yaşanan hadisənin real olmadığını bildirib:

"Əlbəttə, həmin səhnə şou idi. Əksər tamaşaçılar bu səhnəyə inandılar. Hətta konsertdə öz qonaqlarımız da baş verənlərə inandı və onu çox həyəcanla qarşıladılar. Bu səhnədən bizim yaradıcı komandanın üzvlərinin çoxu xəbərsiz idi, yalnız kiçik bir qisim məlumatlıydı. Səhnəni oynayanlar rəqqaslar idilər. Bu "oyun"dan sonra səhnədə rəqslərinə davam etdilər. Onlar peşəkar rəqqaslardır.

Hər dəfə konsertlərimizdə tamaşaçıları təəccübləndirməyə çalışırıq. Bu dəfə isə tamaşaçılarımızı həyəcanlandırdıq. Səhnə böyük səs-küyə səbəb oldu. İnsanlar hadisənin real olduğuna inandılar. Biz isə istədiyimizə nail olduq, yəni maraqlı, inandırıcı şou göstərdik".

Qeyd edək ki, "Bu şəhərdə"nin fevralın 22-23-də keçirilən konsert proqramında kuryoz hadisə baş verib. Tamaşa başlamamışdan əvvəl, zal dolu olduğu bir zamanda bir qadın guya ərinin başqa bir qadınla tamaşaya gəldiyini görüb. "Qəzəblənmiş" qadın ərinə yaxınlaşaraq qışqıra-qışqıra onu sorğu-suala çəkib, daha sonra qadına hücum edib.