Qazaxıstan filmi onlayn kinoteatrlardan yığışdırıldı - SƏBƏB

Qazaxıstanlı rejissor Adilxan Erjanovun “Kadet” adlı qorxu filmi Rusiya onlayn-kinoteatrlardan Roskomnadzorun tələbi ilə yığışdırılıb.

Publika.az xəbər verir ki, bu barədə “Ehtiyatlı olun, xəbərlər” "Telegram" kanalı məlumat yayıb.

Roskomnadzorun məlumatına görə, filmdə intihar səhnələri aşkarlanıb.

Erjanovun filmi 27 noyabrda onlayn platformalarda yayımlansa da, bir həftə sonra “KinoPoisk” və “IVI” xidmətlərindən çıxarılıb. Roskomnadzor əlavə edib ki, qanunvericiliyə - “İnformasiya, informasiya texnologiyaları və informasiya mühafizəsi haqqında” qanuna uyğun olaraq onlayn-kinoteatrlardan bu səhnələri kəsmək tələb olunub.

Gözlənilir ki, “Kadet” düzəlişlərdən sonra platformalara qaytarılacaq.

Süjetə görə, tək ana Alina oğlu Seriki böyüdür. Serik elitar hərbi məktəbdə zorakılığa məruz qalır. Filmin premyerası 2024-cü ilin payızında baş tutub və bir neçə beynəlxalq festivalda nümayiş etdirilib. Film Qazaxıstanı “Oskar” mükafatında təmsil edə bilərdi, lakin çəkiliş qrupundan bir üzvün Akademiyanın münsiflər heyətində olması buna mane olub və “Kadet” nominantlıqdan çıxarılıb.

Hüseyn İbadlı