İstanbulda Azərbaycan caz musiqisinə həsr olunan konsert keçirildi

Türkiyənin İstanbul şəhərində ənənəvi olaraq keçirilən “Türk telekom prime qəhvə” konserti növbəti dəfə Azərbaycan caz musiqisinə həsr edilib. Bu məqsədlə İstanbulun ən böyük mədəniyyət məkanı olan Atatürk Mədəniyyət Mərkəzində görkəmli Azərbaycan bəstəkarı İlyas Mirzəyevin konsert proqramı təşkil edilib.

Publika.az xəbər verir ki, mərkəzin bədii rəhbəri Remzi Buharalının təqdimatında keçirilən konsertdə bəstəkarın “Eşq röyaları”, “Karvan”, “Bakının işıqları”, “Əlvida” kimi əsərləri səsləndirilib. Bunların arasında İlyas Mirzəyevin həyat yoldaşına həsr etdiyi “Leyla” əsəri də yer alıb.

Konsert “Musiqinin sonsuz cizgisi - Şərq musiqisinin qərb musiqisi üzərindəki səs xəritəsi” başlığı altında təşkil olunub.

Proqramda mövzu ilə bağlı fikirlərini bölüşən Remzi Buharalı İlyas Mirzəyev yaradıcılığının şərq və qərbin musiqi dünyasının səs rənglərini eyni cizgi ilə birləşdirərək dinləyicini valehedici bir mənəvi səyahətə çıxardığını deyib.

Konsert izləyicilərin gur alqışları ilə müşayiət olunub.

Proqramda iştirak edənlər arasında Türkiyənin ictimaiyyət və mədəniyyət sahəsində tanınmış simaları da yer alıblar.