Qarabağ abidələri İslam Dünyasının İrs Siyahılarına daxil edildi - FOTO

10–13 fevral tarixlərində Özbəkistan Respublikasının Daşkənd şəhərində İslam Dünyası Təhsil, Elm və Mədəniyyət Təşkilatının (ICESCO) İslam Dünyası İrs Komitəsinin 13-cü sessiyası keçirilir.

Publika.az xəbər verir ki, sessiya çərçivəsində fevralın 10-da İslam Dünyasının İrs Siyahısına və İslam Dünyası İrsinin İlkin Siyahısına təqdim olunmuş nominasiyalar müzakirə edilib.

Azərbaycan Respublikasının Mədəniyyət Nazirliyi tərəfindən hazırlanmış Ağdam “İmarət” Tarix-Memarlıq Muzey Kompleksi və “Şuşa Şəhər Dövlət Qoruğu” nominasiya fayllarının ICESCO-nun İslam Dünyası İrs Siyahısına daxil edilməsi barədə qərar qəbul olunub.

Bununla da ilk dəfə olaraq Ağdam abidələri beynəlxalq mədəni irs siyahılarına daxil edilmişdir. Azərbaycanlılar üçün müqəddəs sayılan XVIII əsrə aid bu tarix-memarlıq Kompleksində Qarabağ xanlığının əsasını qoymuş Pənahəli xanın İmarəti ilə yanaşı onun və xanlıqda müxtəlif illərdə hakimiyyətdə olmuş hökmdarlar - İbrahimxəlil xanın və onun oğlu Mehdiqulu xanın qəbirüstü türbələri, həmçinin Mehdiqulu xanın qızı Xurşidbanu Natəvanın, Qarabağ xanlarının nəslindən olan digər görkəmli şəxslərin məzarları da yerləşir.

Azərbaycan Respublikasının Prezidenti cənab İlham Əliyevin 20 fevral 2025-ci il tarixli, 494 nömrəli Sərəncamı ilə Ağdam şəhərində “İmarət” Tarix-Memarlıq Muzey Kompleksinin yaradılması Qarabağ bölgəsində mədəni irsin dirçəldilməsinə və tarixi-mədəni dəyərlərin bərpasına dövlət səviyyəsində verilən xüsusi diqqətin bariz nümunəsidir.

Prezident İlham Əliyev 2024-cü il sentyabrın 19-da Ağdam İmarət Kompleksinin bərpadan sonra açılışında iştirak edib.

Ərazisi 3,3 hektar olan kompleks mərasimlərin keçirilməsi üçün nəzərdə tutulmuş tikililər, türbələr, tarixi qəbiristanlıq, Qarabağ atlarının təqdimatı üçün atçılıq kompleksi və ziyarətçi mərkəzindən ibarətdir.
Ağdam İmarət Kompleksi artıq ziyarətçilər üçün açıqdır.

Həmçinin Azərbaycanın mədəniyyət beşiyi olan Şuşanın ICESCO-nun Siyahısına daxil edilməsi bu qoruq-şəhərin dirçəlməkdə olan tarixi-mədəni irsinə verilən dəyərin əyani təcəssümüdür.