Dəb

Kraliçanın mirvari sevgisi trend oldu – FOTO

27 Sentyabr 2022 16:59

İngilis Kraliçasının qiymətləndirdiyi klassik mirvari sırğalar hər bir qızın sandıqçasında olmalıdır.

Publika.az xəbər verir ki, bu il belə sırğalar həmişəkindən daha aktual olacaq.

Meqan Markl və ya Keyt Middleton obrazları haqqında istənilən qədər mübahisə etmək olar, lakin II Yelizavetanın hər ikisinin obrazlarına təsirini inkar etmək çətindir. Kraliça əsl zərif qadın kimi özünəməxsusluğunu sarayda nümayiş etdirməklə qalmır, həm də ondan kənarda da təsiredici rol oynayır, dəbin dəyişkən, stilin isə əbədi olduğunu hər çıxışında diqqətə çatdırırdı.

Məhz Ülyahəzrət zərgərlik protokolunun qanunlarını qoydu, o, öz nümunəsində göstərirdi ki, xüsusi seçilmiş broş və ya sırğa sahibini daha cəlbedici edə bilər. Kraliça krallığın məşhur gəlinləri - həm Keyt, həm də Meqana xüsusi günlərdə taxmaq üçün gözəl zərgərlik nümunələri hədiyyə edib. Bunlar kiçik brilyantlarla işlənmiş platin əsaslı mirvari sırğalardır. Amerikalı hersoginya üçün kraliça sevimli sırğalarının daha incə variantını seçmişdi. Sonradan onun oxşarını Keytin də qulağında gördük.

Dəb tənqidçiləri bu fikirdədir ki, mirvari aksessuarlar bu il xüsusilə aktual olacaq. Buna səbəb kraliçanın dəfninə ailə üvlərinin matəm libaslarını ən gözəl mirvari dəstləri ilə bəzəməsidir. Məsələ ondadır ki, İngiltərə krallığında mirvari matəm simvoludur. Bu bəzək əşyası sadəcə mənəvi dəyər daşımır, həm də protokol atributudur. Kraliça Viktoriyadan qalma ənənəyə görə, matəm zamanı qadınlar mirvari taxmalıdır. Qeyd etmək olar ki, keçən il Şahzadə Filipin ölümündən sonra kraliça özü də mirvari taxmış və ölümünün son günlərinədək onu boynundan çıxarmamışdı. Bu, həyat yoldaşına yas tutan kraliçanın şahzadəyə qarşı sevgi və ehtiramının əlaməti idi.