FTB-dən amerikalılara xəbərdarlıq: Partladacaqlar

ABŞ Federal Təhqiqat Bürosu (FTB) Parisdəki terror aktlarının nümunəsi üzrə ABŞ-da terrorçuların hücumları haqqında xəbərdarlıq edib.

Publika.az xarici mediaya istinadən xəbər verir ki, bu barədə CNN telekanalı bildirib.

“FTB-də oxşar hücumlarla bağlı narahatçılıq mövcuddur”, - telekanalın müxbiri deyib.

Onun sözlərinə görə, Amerika hakimiyyətinin nümayəndələri Parisdəki terror aktları haqqında informasiya almaq üçün fransalı həmkarları ilə daim əlaqə saxlayırlar.

Vaşinqton, Nyu-York və Boston da daxil olmaqla ABŞ-ın böyük şəhərlərində təhlükəsizlik tədbirləri gücləndirilib. Hüquq-mühafizə orqanlarının nümayəndələri vurğulayırlar ki, bu konkret təhlükələrə reaksiya deyil, yalnız ehtiyat tədbirlərdir.

Qeyd edək ki, ötən gecə Parisdə silsilə terror aktları həyata keçirilib. Son məlumatlara görə, 160-a yaxın insan həyatını itirib. Səkkiz terrorçunun məhv edildiyi, onlardan bir çoxunun kamikadze olduğu bildirilir.

Terror aktlarına görə məsuliyyəti İŞİD terror qruplaşması öz üzərinə götürüb.

Ömər Dağlı