Dünya

Tiflisin Bakıya “buynuz” göstərməsinin səbəbi - 5,3 trilyon kubmetr qaz

3 Fevral 2016 18:07

Gürcüstanın Cənubi Kaxetiya bölgəsində 5,3 trilyon kubmetr təbii qaz aşkar edilib.

Publika.az xəbər verir ki, bu iddia ilə ABŞ-ın “Frontera Resources” şirkətinin rəhbəri Stiv Nikandros “Rambler News Service” xəbər agentliyinə bildirib.

Onun sözlərinə görə, aşkar edilən təbii qaz 10 il ərzində bazara çıxarılacaq və bu, qaz bazarında oyun qaydalarını dəyişdirəcək: “Şirkət yaxın 5 ildə qazın ixracına başlamaq niyyətindədir. Təbii qazı Türkiyə və Şərqi Avropa ölkələri alacaqlar”.

Qeyd edək ki, “Frontera Resources” şirkəti kəşfiyyat və karbohidrogen ehtiyatlarının çıxarılması ilə məşğul olan neft-qaz şirkətidir. Şirkət Gürcüstanda qaz axtarışlarına 2014-cü ilin aprelində başlayıb. Şirkətin 2015-ci il proqnozuna görə, Gürcüstanın 3,8 trilyon kubmetr qaz ehtiyatına malikdir.

Hazırda bu iddia olaraq qalır. Lakin Gürcüstanın bu həcmdə qaz ehtiyatının olması doğru olarsa, qaz müharibələrində kartların qarışacağı qaçılmaz olacaq.

Asif