Dünya

İspaniya diktator Frankonun izlərini siləcək

10 Oktyabr 2024 16:22

İspaniya öz tarixinin ən qanlı illəri olan diktator Fransisko Franko dövrünün (1936-1975) ideologiyalarını müdafiə edən fond və dərnəkləri qadağan etmək üçün ilk addımı atıb.

Publika.az xəbər verir ki, İspaniya parlamentində qəbul edilən və Senata göndərilən qanun layihəsi Franko rejimini müdafiə edən dərnək və fond kimi bütün qeyri-hökumət təşkilatlarının (QHT) fəaliyyətinin qadağan edilməsini nəzərdə tutub.

Müxalifətdəki ifrat sağçı Vox Partiyası istisna olmaqla, bütün digər siyasi partiyalar, o cümlədən ana müxalifət Xalq Partiyası (PP) koalisiya hökumətinin əsas tərəfdaşı olan Sosialist İşçi Partiyasının (PSOE) təqdim etdiyi qanun layihəsini dəstəkləyib.

Sözügedən qanun layihəsi Senatda qəbul edilərsə və qanuna çevrilərsə, Franko rejiminin ideologiyalarını müdafiə edən bütün QHT-lər, xüsusilə diktator Frankonun ölümündən sonra 1976-cı ildə qurulan və hələ də aktiv fəaliyyət göstərən Fransisko Franko Fondu qadağan olunacaq.

Aysel Şahmar