Dünya

Çin ABŞ-ın yeni tariflərindən QƏZƏBLƏNDİ

2 Fevral 2025 08:24

Çin tərəfi kəskin narazılığını bildirir və ABŞ-ın idxal olunan Çin mallarına tətbiq etdiyi yeni tariflərə qəti şəkildə qarşı çıxır.

Publika.az "Sohu"ya istinadla xəbər verir ki, bu barədə Çin Xalq Respublikasının Ticarət Nazirliyinin bəyanatında deyilir.

"Çin bununla bağlı kəskin narazılığını bildirir və qəti şəkildə buna qarşıdır", - rüsumların tətbiqi ilə bağlı bəyanatda deyilir.

Həmçinin qeyd edilib ki, “Çin tərəfi ABŞ-ı yanlış hərəkətlərini düzəltməyə və Çinə doğru hərəkət etməyə çağırır. Çin Ticarət Nazirliyi də problemlərin həllinə bərabərlik, qarşılıqlı fayda və qarşılıqlı hörmət prinsipləri əsasında yanaşmağa çağırıb”.

ABŞ-ın birtərəfli qaydada tariflər tətbiq etməsi Ümumdünya Ticarət Təşkilatının (ÜTT) qaydalarını ciddi şəkildə pozur. Nəşrin fikrincə, Vaşinqtonun belə qərarı nəinki öz problemlərinin həllinə töhfə vermir, həm də Çin və ABŞ arasında normal iqtisadi və ticarət əməkdaşlığını pozur.

Hüseyn İbadlı