ABŞ və Ukraynanın yeni 19 maddəlik planı: Bu tələblər çıxarıldı

Donald Tramp administrasiyasının Ukraynada müharibəyə son qoymaq üçün nəzərdə tutduğu planın müddəaları 28-dən 19-a endirilib.

Publika.az Ukrayna mətbuatına istinadən xəbər verir ki, dəyişikliklər noyabrın 23-də Cenevrə görüşü çərçivəsində edilib.

"The Kyiv İndependent" qəzetinin məlumatına görə, 19 maddədən ibarət yeni layihədə ötən həftə ortaya çıxan bəzi mübahisəli müddəalar çıxarılıb. Ən diqqətçəkən dəyişiklik Ukraynanın Donbas ərazisinin bir hissəsini güzəştə getməsini tələb edən bəndin çıxarılmasıdır. Bu məsələ ilə bağlı son qərarı isə ABŞ prezidenti Donald Tramp və Ukrayna prezidenti Vladimir Zelenski verəcək.

Bundan əlavə, Ukraynanın NATO-ya qoşulmamasını və ordunun azaldılmasını tələb edən bənd də layihədən çıxarılıb. İlkin versiyada iki milyondan çox aktiv və ehtiyat əsgəri olan Ukraynanın hərbçi sayını 600 minə endirməsi planlaşdırılırdı.

Digər bir dəyişiklik müharibə cinayətlərinə görə kollektiv əfv maddəsi ilə bağlıdır. Yeni layihədə müharibə qurbanlarının şikayətlərinin nəzərdən keçirilməsi tələbi də var.

Lakin Zelenski "X" sosial media platformasında verdiyi açıqlamada layihənin hələ yekunlaşmadığını bildirib: “Artıq 28 maddə qalmayıb. Yeni versiyaya düzgün elementlərin əksəriyyəti əlavə edilib. Layihəni tamamlamaq üçün işlərimiz davam edir və bunu şərəflə etməliyik”.

O, həmçinin Rusiyanın prosesi sabotaj etməyə çalışacağı barədə xəbərdarlıq edib. “Dezinformasiya yayan və xalqımızı qorxutmağa çalışanlar var”, - deyə o vurğulayıb.

Ukrayna xarici işlər nazirinin müavini Sergiy Kisiltsya yeni plana hər iki tərəfin "müsbət" reaksiya verdiyini bildirib. ABŞ dövlət katibi Marko Rubio da yeni layihənin son təklif olmadığını, hazırda üzərində işlərin davam etdiyini söyləyib.

Planın yekun təsdiqi isə ABŞ və Ukrayna arasında koordinasiyadan, eləcə də Rusiyanın mövqeyindən asılı olacaq.

Roza