Türkiyəyə qarşı “3+1” planı: Yunan mətbuatı gizli detalları açıqladı

Afina mətbuatı Yunanıstan, İsrail və Cənubi Kiprin Türkiyəyə qarşı "3+1" planı hazırladığını iddia edib.

Publika.az xəbər verir ki, Afinanın "Sigma Live" nəşri İsrail və Cənubi Kiprlə müdafiə əməkdaşlığını "Türkiyəyə qarşı ortaq cəbhə" kimi təqdim edən təəccüblü bir təhlil yazısı dərc edib.

ABŞ-ın FDD beyin mərkəzinin hesabatına əsaslanan təhlildə bölgədəki güc balansının Ankaranın hərəkətləri ilə yenidən formalaşdığı iddia edilib. Hesabata görə, Afina ilə Təl-Əviv arasında müdafiə yaxınlaşmasının sürətlənməsi əsasən Ankaranın regional gücünün "qətiyyətli və istiqamətləndirici" olması ilə əlaqədardır.

Hesabatda həmçinin Türkiyənin F-35 proqramından kənarda qalmasına baxmayaraq, müdafiə sektorundakı yerliləşdirmə səyləri ilə regionun ən dinamik və gözlənilməz hərbi gücünə çevrildiyi bildirilib.

Hesabatda qeyd olunur ki, "3+1" planı çərçivəsində irəli sürülən diplomatik mexanizmlər Yunanıstanın enerji təhlükəsizliyi və Ukraynaya mayeləşdirilmiş təbii qaz daşınması üçün "tranzit nöqtəsi" rolunun genişlənməsinə səbəb olub.

Son olaraq vurğulanıb ki, Türkiyə müdafiə modernləşdirilməsi, enerji siyasəti, "Mavi Vətən" doktrinası və diplomatik təşəbbüsləri ilə bütün regional dinamikanı formalaşdıran mərkəzi aktor olaraq qalmaqda davam edir.

Roza