Aralıq dənizində gərginlik: Türkiyəyə qarşı ittifaq qurdular

Yunanıstan və İsrail, Şərqi Aralıq dənizində Türkiyəyə qarşı hərbi əməkdaşlığı gücləndirir.

Publika.az xəbər verir ki, ABŞ-ın Demokratiyaları Müdafiə Fondunun hesabatına görə, əməkdaşlıq silah satışları və hərbi təlimləri əhatə edir.

Hesabatda bildirilir ki, Türkiyənin müdafiə sənayesindəki addımlar Afinada narahatlıq yaradıb. Yunanıstan 36 PULS topçu raket sistemi və “Axil Qalxanı” hava müdafiə sistemi üçün İsraildən texnologiya almağı planlaşdırır.

2021-ci ildə iki ölkə 1,65 milyard dollarlıq saziş imzalayaraq yunan hava qüvvələri üçün təlim mərkəzi qurmuşdu. İsrail və Yunanıstan hərbçiləri “əməkdaşlığı gücləndirmək” üçün noyabrın 5-də hava, 13-də isə dəniz təlimləri keçirib. Vaşinqton son bir ildə Şərqi Aralıq dənizində fəaliyyətini artırıb, o cümlədən Yunanıstan hərbi obyektləri və limanlarından istifadəni genişləndirib.

Egeydə Yunanıstan sahil mühafizəsinin Türkiyənin balıqçı qayıqlarına atəş açması, həmçinin Türkiyə F-16-ları ilə yaşanan "Yunanıstan hava sahəsi mübahisələri" Afina tərəfindən gərginliyi artıran addımlar kimi qiymətləndirilib. Hesabatda həmçinin bildirilir ki, İsrailin F-35 təyyarələrinə sahib olması və Yunanıstanın ABŞ-dan eyni təyyarələri sifariş etməsi bölgədə riskləri artırır.