Fidan-Vadeful görüşü: Berlin Suriyanın bütövlüyünü dəstəklədi, Ankara isə...

Türkiyənin xarici işlər naziri Hakan Fidan və almaniyalı həmkarı Yohan Vadeful birgə açıqlamalar veriblər.

Publika.az xəbər verir ki, Fidanın Almaniya səfəri çərçivəsində baş tutan görüşdə əsas müzakirə mövzusu Suriya məsələsi olub.

Vadeful Suriyadakı siyasi proses və ölkənin gələcək idarəçiliyi ilə bağlı aydın mövqeyini açıqlayıb. O, Almaniyanın kürdlər üçün federal sistemi yox, beynəlxalq səviyyədə tanınmış sərhədlər daxilində fəaliyyət göstərə bilən suveren Suriyanı dəstəklədiyini bildirib.

"Əlbəttə ki, Suriya daxilində bütün seqmentləri əhatə etmək üçün bütün lazımi səylərin göstərilməsi vacibdir, lakin Suriya dövlətinin özünü necə təşkil etməsi tamamilə Suriyanın öz suverenliyi və suveren hüququdur", - alman nazir söyləyib.

Vadeful qeyd edib ki, beynəlxalq ictimaiyyət bu hərtərəfli və çətin prosesdə Suriyanı dəstəkləməyə davam edəcək.

Hakan Fidan isə hazırda bütün dünyada ehtiyac duyulan sülhün vacibliyinə toxunub:

"Ukraynada müharibənin dayandırılması, Qəzzada sülh planının həyata keçirilməsi və Suriyada sabitlik bizim üçün çox vacibdir. Biz yenidən dağıntılara və soyqırımına qayıtmamalıyıq. Onsuz da kifayət qədər dağıntı və qırğın var. Hamımız birlikdə intensiv şəkildə işləməliyik. Humanitar yardım mümkün qədər tez çatmalıdır. Əks təqdirdə, yenidən zorakılıq riski ilə üzləşə bilərik".

Roza